Ромаверзитас - со поддршка за развој кон лични и колективни еднакви пристапи и можности
Кои фактори ги мотивираат младите Роми да продолжат со своето образование?
- Детали
- Објавено: Понеделник, 02 Април 2018 11:44
- Посети: 10737
Главни мотивациски фактори за продолжување на образованието кај Ромите се желбата за подобар животен стандард и подобра работна позиција, желбата и љубовта за успешен професионален и академски развој и волјата за вложување во ромската заедница. Ова го покажа спроведената анкета насловена како „Што те мотивира да продолжиш да се образуваш“.
За да се реализираат овие предуслови, велат испитаниците во анкетата, важни се семејната поддршка, инспирацијата од успешните Роми и финансиските можности овозможени од фондовите за ромската заедница.
Во анкетата, од контактирани 80 Роми од прв и втор циклус на студии, одговорија 50 студенти. Според нив, со стекнување поголема титула се менува веќе познатата слика за Ромите, сé има поголемо влијание врз вклученоста и унапредување на општеството и општествените процеси.
Еден од анкетираните тврди дека за продолжување на обрзованието главен мотивирачки фактор е „подобриот животен стандард и стил, подоброто работно место и поголемата почит и углед кај луѓето“. Тука спаѓа и „желбата за успех и континуирано интелектуално надоградување на професионален и личен развој“, додава друг испитаник.
Голем број од анкетираните се изјасниле дека семејството и љубовта кон тоа што го изучуваат преставува мотивација да продолжат да се образуваат. „Моите ме мотивираат да продолжам да се образувам, посочувајќи на тешкиот живот, сиромаштијата и проблемите што се соочувале и се соочуваат, да не ги запоставувам можностите што ми се нудат, туку да ги зграпчам и да стојам цврсто на свои нозе“, вели еден од анкетираните.
Другите студенти ги мотивира самата љубов кон она што го изучуваат, нивната посветеност, истрајност и амбициозност да сознаат и да станат експерти во одредена област. Покрај тоа и луѓето со кои работат, како и успешните Роми низ светот. Од друга страна, ромските фондови имаат најголемо влијание врз академците. Тие сметаат дека без стипендиите и грантовите би било невозможно да се продолжи образованието и да се стекне поголема титула во образовниот процес и општество.
Според анкетираните има и други мотвациски фактори како што се подобра и посигурна иднина, оформување економски стабилно и едуцирано семејство, да се биде пример што ќе ги мотивира и инспирира младите Роми, да се има директно влијание врз политичките одлуки во заедницата и самата желба за успех, да се прошират интелектуалните видици и капацитети, да се обезбеди подобра иднина за децатa и да се промени сликата за Ромите.
***Анкетата ја реализираше Лебишка Селоска, студент на Филолошкиот факлутет „Блаже Конески“ при Универзитетот „Св. Кирил и Методиј“ во Скопје, која е и автор на овој текст.
